yazeez's feeds » A3N: Alien 3aba6 Network!

Feeds

19242 items (16 unread) in 85 feeds

• yazeez
• ** MiYaFuSHi **
• . (1 unread)
• »CyberRowdy«
• 2:48AM [The B-Sides]
• A.U.R.O.U.S
• A3N: Alien 3aba6 Network!
• Alien Memoirs
• All q8 Shabab Concern
• AmoOora
• ananyah.COM
• Annals of a Space Cowboy
• Area 77
• Arsenal News Review (2 unread)
• Bella Color
• Charming-79
• DB23's Blog
• DeeM
• Desperately Wandering
• DiiGMaa
• do0da
• Erzulie: Seeing Red
• eshda3wa
• EXzombiesm
• Fairy Diary
• Flamingoliya
• Fluent Thoughts
• Fonzation (2 unread)
• Forza Kuwait
• Frankom
• God Help Us All...
• Honey Alba
• Hussa-G
• iDip
• iKuwait
• IMMORTALIZATION
• Isolated Serenity
• iTalal
• Jabriya Za7ma
• Jacqui
• Jewaira's Boudoir
• K.TheKuwaiti.com
• Kuwait Hubris
• KUWAIT UNPLUGGED
• Kuwaiti Femme
• Kuwaitism
• Laialy_q8
• MacaholiQ8
• MAZE-OF-THOUGHTS
• Missy♥
• My Final Haven
• My Life As MishMisha
• No3ik
• Nothin to Say
• Papillona ®
• Photo Matt (1 unread)
• Praxis
• Q80.com زوايا وابعاد
• Saudi Jeans
• Savior Machine
• Shopaholic Q8eya
• Some Like It Haute
• SpiKeD Q80 (1 unread)
• TAT THE DON
• The One
• The Sky is Blue
• The Stallion's Stable of Thoughts and Experiences
• The Swair Blog
• The Ultimate
• Yara's Memoir
• Z District (1 unread)
• بـلا نــيــلــه
• The Purgatorian Collection
• KHLOUD
• Kinan's Little Place Online
• Kuwaiti Cosmopolitan
• طاخ طيخ (1 unread)
• The Six-K Club
• Anything Goes (1 unread)
• Serendipity
• Arsenal-Mania.com | The Arsenal Website For Arsenal Fans (5 unread)
• Kuwait-Style.com
• Financy
• ChiKapaPPi
• Fantasized Reality (1 unread)

A3N: Alien 3aba6 Network!

• August 09, 2008
• 19:04

  [nt]

   » ‎ A3N: Alien 3aba6 Network!
  
  
• August 05, 2008
• 7:02

  وين الدعم؟

   » ‎ A3N: Alien 3aba6 Network!
  الموضوع السابق
  
  
  الموضوع بجريدة الوطن
  الأبراج جزيرة تصنع السياحة في المستقبل
  
• August 03, 2008
• 7:19

  الركادة زينة

   » ‎ A3N: Alien 3aba6 Network!
  المصدر
  
  
  
  يا ان السالفه مثل ما انا فاهمها .. يا انا فاهمها غلط
  
  احد يفهمني تعليق ليلى احمد .. ودها تكون مكان مهند؟ .. ام ودها تكون مكان المنسف؟
  
  
  
  ملاحظه: مواضيع الايلينز يايتكم بالدرب
  
• August 02, 2008
• 22:16

  Believe!

   » ‎ A3N: Alien 3aba6 Network!
  Phoenix Arizona - April 22,2008
  
  
  
  
  Larry King - Alien On Tape - Part 1
  
  
  
  
  Larry King - Alien On Tape - Part 2
  
  
• July 30, 2008
• 17:22

  الديايه اول - أم - البيضه

   » ‎ A3N: Alien 3aba6 Network!
  
  
  السؤال للعباقرة يقول
  
  اذا احد "سرق" موقع او مدونة .. ومن ثم كتب موضوع فيها اباحي او خاره بالكلام عن الكبار او كشف اسرار الدوله
  
  منو اللي راح ينتل ويتسوطر؟ .. سارق الموقع او المدونه ولا صاحبها الاصلي؟
  
  
  هذا هو السؤال
  
• July 26, 2008
• 16:43

  فاقدينكم

   » ‎ A3N: Alien 3aba6 Network!
  
  
  مكانكم خالي .. وننتظر عودتكم
  اللي يعرف احد فيهم .. يوصل سلامي لهم
  
  لمياء الحالمة
  
  
  
  نـــيله
  
• July 24, 2008
• 20:42

  عرفي؟ .. متعه؟ .. مسيار؟

   » ‎ A3N: Alien 3aba6 Network!
  هذا البوست إهداء حق شحص عزيز علي .. صارله فتره مختفي
  
  موقع كويتي مفيد حق اي واحد طايح بكبد نفسه
  Khitba.com
  Kuwaiti Marriage
  
  
  Khitba.com ما هو هو موقع مخصص للكويتيين الذين يريدون الزواج والبحث عن شريك حياتهم. الكويتيون يواجهون صعوبة في أن يجدوا الزوج المناسب. هذا الموقع صمم لتسهيل عملية البحث لإيجاد الشريك المناسب مع الأخذ بعين الاعتبار العادات والتقاليد الكويتية
  
  الهدف من الموقع هو مساعدة الكويتيين في إيجاد شريك حياتهم بطريقة محترمة وآمنة
  
  كلمة "كويتيين" تكررت مليون مره .. واضحه ان راعي الموقع غير كويتي وحب يكسب اجر ويزوجنا على عاداتنا وتقاليدنا
  
  عزيزي راعي الموقع .. هل موقعك الذي "سيحل مشاكلنا في الحصول على الشريك المناسب" من عاداتنا وتقاليدنا
  
• July 21, 2008
• 17:40

  !طاقات مدفونة

   » ‎ A3N: Alien 3aba6 Network!
  
  
  اقف احترامات لهذي النوعيه من الشباب .. شباب اهتماماتهم تجميل البلد وبنائه .. مشروع تخرج يخدم البلد .. بصراحة المشروع بهرني .. وقعدت اتخيل منظره من الجو وانا واصل الديره من سفرة طويلة .. بصراحه اتوقع راح يكون منظره خيالي .. شعار ديرتي هو مطار على جزيرة اصطناعيه
  
  افتخر بهذي النوعية من الشباب .. تمنياتي لهم بالنجاح والتوفيق في حياتهم
  
  السناريو القادم من الجهات المعنية:
  
  بعد استلام مشروع مثل هذا بتكلفة آلاف الدنانير بارده مبرده
  راح ينقط بالدرج او تحت المكتب ويندفن ولا يشوف النور
  
  مشروع قوي يمثل واجهة بلد قدّم على طبق من ذهب للحكومه مجانا من شباب طموح وده يعطي
  كل اللي قدروا عليه هو اعطاء الطلبه دروع عادية .. وتحبيطهم ودفنهم بوظائف محد يعرف عنها شي .. ولا يقدرون يبدعون بأفكارهم وخبراتهم
  
  والله حرام هالنوع من الشباب يندفن
  
  سؤال: في مكان الواحد يروح له ويقدر يعرض فيه افكار تعمير البلد او يساعد على حل مشاكل البلد؟ .. ولا الواحد لازم ينطر بالصدفه يعرفون عنه؟
  
  الشباب هذيل لو ماكان هذا مشروع تخرج وين كانوا يقدرون يعرضونه؟
  
  بومريوم مسكين ترسه افكار ووده يساعد .. محد معطيه ويه .. وين يقدر يروح ويقابل لعرض افكاره؟
  
  وايد شباب اعرفهم عندهم مشاريع تجميليه .. منو يلجؤون له؟
  
  ليش ماكو معرض عندنا يعرض هالسوالف .. حتى لو كان سنوي بأرض المعارض .. تعرض مشروعك على كبار التجار وتشوف منو يشتريه ويطبقه .. والله طريقه تشجع الشباب ان يبنون ديرتهم
  
  ليمن نشوف هذاك اليوم
  اخليكم مع هالموضوع اللي ماله شغل بالموضوع اللي فوق
  
  
  قبل سنة تقريبا كتبت موضوع عن ارتفاع الاسعار .. وبالتحديد عن حليب الاطفال
  
  اليوم ربعنا لاحظوا ان الحليب سعره ارتفع
  
  صح النوم .. خلكم من هالحليب وشوفوا لنا حليب النيدو جم صار سعره اليوم
  
• July 19, 2008
• 12:38

  انا أختار الأسم

   » ‎ A3N: Alien 3aba6 Network!
  
  السناريو القثيث اللي يلاحق كل رب اسره من أول يوم تخبره زوجته بأنها حامل هو .. تسمية الياهال
  
  تسمية الياهل لازم تكون للأبوين .. وبدون تدخلات الأهالي والاصدقاء .. مع مراعات إختيار الأسامي المعتدله
  
  هالايام .. نشوف الابداعات غير طبيعيه في تسمية الاطفال .. وخصوصا للمواليد الاناث .. يعني الولد مهما تلف وتدور اسامي الاولاد معدوده وتدور في حلقه ماتطلع عنها .. اللهم ان الاسماء قد تختلف حسب الدول العربيه .. كالأسامي السورية والمصرية والخليجيه واللبنانيه .. يعني اللي يسمي ولده أيمن بالكويت يكون شكله غريب لأنه اقرب للمصري .. وهذا اقوى شي بالنسبه لتسمية الاولاد .. طبعا هالأيام في ناس متهددين ودهم يسمون اولادهم "دانيال" ويقولون اسم نبي .. انزين في نبي اسمه "اسرائيل" .. ليش ماتسمون عليه؟
  
  الطامه الكبرى هي تسمية البنت .. اسامي البنات هالأيام صاير ابداع .. معروف ان بعض اسامي البنات يميزها "هاء التأنيث" .. مثل جمانه .. لكن هالأيام تتعمد الامهات الى التخلص من هاء التأنيث .. مثل جمان .. انزين ليش؟
  
  حلاة البنت ليمن اسمها يكون مصغر .. وليس جمع
  
  والهبه الثانية .. اضافة "ال" قبل الاسم .. لإكسابة الصفه مثل .. الجمان .. الحنان .. الزين .. الخرابيط
  
  والهبه الثالثه .. ابتكار اسامي مادري من وين .. مثل اسم احد الكواكب .. او اسم احد الورود .. او اسم مجرى مجاري في مادري اي جبل و من هالخرابيط .. وآخرتها البنت تكبر وتتعقد من اسمها
  
  شخصيا اسم "حور" ما اتحمله كلش مادري شلون الاهل يطلقون هالاسم على بناتهم .. هل حاول احد فيكم ان يلفظ هذا الاسم بالانجليزي؟؟ .. حده غلط .. ومو حلو ان تنادى البنت بهذا الاسم بالانجليزي
  
  ياجماعه .. انتوا محاسبين على تسمية عيالكم .. لاتستخدمون عيالكم كأثاث او هبه بو مره وحده وبس
  
• July 16, 2008
• 20:10

  ونعم الاخلاق

   » ‎ A3N: Alien 3aba6 Network!
  يعرض هذي الايام على قناة فنون المسلسل الكويتي "تاكسي تحت الطلب" .. امس بالليل في احدى الحلقات (وبالتحديد حلقة 13) طلع هذا المشهد .. وبما ان انا ماحب هالسوالف قلت انقله لكم
  
  
  
  شد انتباهي تيشيرت خالد العجيرب .. بما انه الوحيد الاحمر بينهم ولونه شبه فاقع .. بس اللي شدني اكثر الكتابة اللي عليه
  
  يعني بذمتكم .. معقوله طافت على المخرج؟ .. والممثلين؟ .. والمصورين؟ .. والمنتجين؟ .. والرقابه؟
  
  معقوله محد فيهم يعرف المصطلحات الاجنبية والى شنو ترمز؟
  
  اذا اطفال اعمارهم على 10 سنين يعرفون هالمصطلحات من النت .. انتوا ماتعرفونها؟
  
  هل هذا اثبات ان الوسط الفني كله ثواله بالانجليزي؟ .. ما الومهم بصراحه اذا مايعرفون انجليزي .. من شاف اشكال اللي قاعدين تختارونهم للمجال الفني .. الربع ماخذينها كووووول
  
  المشكلة ان توني ادري ان المسلسل انعرض السنه اللي فاتت يعني حتى لو في احد صاد المشهد من قبل كان يقدرون بالمونتاج يحطون غشاوه على التيشيرت .. بس طاف محد شاف
  
  
  إخص على هيك رجاله
  
• July 12, 2008
• 19:26

  I TAWT I TAW A PUDDY TAT!

   » ‎ A3N: Alien 3aba6 Network!
  
  
  كل فريج بالكويت فيه عتوي "صح" يميزه .. والعتوي هذا لازم يكون مكـوّش على كل شي بالفريج .. درامات الزبالة (حشاكم) .. العذراوات من القطط .. يبول على جامات السياير .. يأذيك طول الليل بصوته العذب .. وفي امه خير اي عتوي ثاني يطب الفريج
  
  امس بالليل وانا راد البيت .. اول مانزلت من السياره ولا في عتوي يديد اول مره اشوفه بالفريج من اول ما سكنت .. قاعد يم مظلة السيارات وكأنه ناطرني .. فتحت الدبه بنزل الاغراض .. والحبيب واقف وفارد جسمه ويطالعني .. بيني وبينه تقريبا ثلاث امتار .. ظل يطالعني بدون اي حركه .. بديت اخزه واخز عينه .. عينه كان شكلها غريب وايد كرستالي .. والقطو كانت ملامحه وكأنه يستهزء .. كشيته مرتين والحبيب لامبالات .. واقف بلاحركه والغريب ان ملامح ويها عليها ابتسامه .. قلت شكله مسبه وماله خلق شي .. شلت الاغراض .. وانا رايح صوب البيت من الباب الجانبي واللي بالعاده يكون ممر طويل يؤدي الى الباب الجانبي للبيت .. ابتدا القطو يلحقني .. "ولييييي شفيها امه هذا؟؟" قلت اكيد من النوع اللي حاكه اليوع واللزقه .. كشيته ثاني مره علشان لايدش الممر .. الحبيب يوقف ويطالعني ببتسامته .. وكأنه مستهزأ فيني .. عطيته ظهري وكملت طريقي .. والا الحبيب وراي .. سرعت خطواتي علشان ادش البيت واصك الباب وقبل لا اوصل عند الباب سمعت "كحة" شخص بالغ وراي .. التفت بسرعه .. ولا حبيبنا مو موجود دورت فوق الطوفه تلفت ولا ماكو اي اثر .. شوي ولا "بريعضي" اسود كبر الكف تقريبا يمشي على الطوفه ويدخل ورى الليت
  
  همممممممم .. شسالفه؟ .. جن؟ .. واحنا ناقصين تخرّع؟
  
  
• July 08, 2008
• 6:47

  Ring a bell ?

   » ‎ A3N: Alien 3aba6 Network!
  حريق كبير في مصنع بصبحان و 60 اطفائي يتعاملون مع السنة اللهب
  جريدة الآن
  07/07/2008
  
  

  اصيب اطفائي اثناء تعامله مع حريق مصنع صبحان ونقل للعلاج ووقع الحريق بمصنع لاعمدة الانارة وبلغت مساحة الحريق 750 متر من اصل مساحة المصنع البالغة 4000 متر

  من جهة اخرى التهمت النيران منزل في الجليب حوله بنغاليون الى مخزن للاعلاف وتعامل مع الحريق الذي اندلع في العاشرة مساء اربعة مراكز اطفاء ايضا ولاتزال جهود المكافحة مستمرة في حريق الجليب ق 4

  يذكر ان الآن قد اشارت في وقت سابق ان اكثر من 60 رجل اطفاء من اربعة مراكز تعاملوا مع حريق في مصنع بمنطقة صبحان ووصف الحريق الذي ابلغ عن احتراقه في السابعة والنصف مساءا بالكبير ولم يعرف حجم الخسائر وهل هي مادية فقط ام هناك اصابات وسوف نتواصل معكم في سرد التفاصيل.

  
  واللي مو فاهم شنو المقصد من هالبوست
  
  اولا
  
  ثانيا
  
  
• July 03, 2008
• 20:50

  التوقيع بعشره والصورة بخمسه وعشرين

   » ‎ A3N: Alien 3aba6 Network!
  لازم يحرجوني
  
  جزيل الشكر للأخت أسيل على مساعدتها على توصيل صوت المدونين للصحف .. ومقالتها اليوم كان تشجيع بالنسبة لي .. ولو ان تعليقاتها عندي من وقت لي وقت
  :P
  
  
  اما بالنسبه لبومريوم .. فذبحنا .. كل شوي رحت القهوه الشعبيه ورحت القهوه الشعبيه .. أبي يوم يعزمني هناك على قلوب مشوية ماكو
  
  
  وبالنهاية نبارك للأثنين على الصفحه الكاملة .. والله يفوقكم
  Keep up the good work
  
  
  وهذي الاغنية اهداء مني لمجلسنا بمناسبة موسم الصيف .. وحالتنا مع الكهرباء والخمسين دينار ولجنة الظواهر الدخيله والقروض وارقام التيلفونات الشهر الياي والصحه والتعليم وارتفاع الاسعار
  
• June 28, 2008
• 18:33

  !!! متــنا حرررررررررررر

   » ‎ A3N: Alien 3aba6 Network!
  تحديث 2
  ****
  الكهرباء طلعت فاصله عن التكيف .. والسبب: الله اعلم .. طقطقولي على بايبات السياره اشتغل كل شي طبيعي .. المهم صاحب المحل ماحب ان انا امشي ودافع "دينار" بس .. قام وفضى الغاز من السياره ورد ترسها .. ليش جذي؟ .. يقول يمكن هذي مشكلة فصلة الكهرباء .. اي مو على راسي دهن انا .. شكو الغاز بالكهربا؟ .. المهم دفعني 10 دنانير ومشيت .. وبعد ماكنت ميت حر صرت ميت قهر .. احد يدل عيادة دكتور نفسي افضفضله اللي في قلبي واشكي له همومي؟ .. بس اتمنى ان تكون دكتوره حلوه .. علشان اطول بمواضيعي
  
  تحديث
  ***
  اليوم اخترب مكيف السياره .. وسنوافيكم بآخر التطورات
  
  
  
  
  ياجماعه مايصير جذي .. درجة الحراره الساعه 8 الصبح تكون 38 درجة مئوية .. وفترة الظهر 50 درجة مئوية .. والليل 45 درجة مئوية .. تكفة خسنا .. صرنا طرشي
  
  انا مو قاعد اعترض على حكمة ربي .. لكن يا اخوان في اختراع اسمه تعتيم او تغييم .. ليش ليلحين عندنا ممنوع ونتخالف عليه ؟؟ .. واللي يرحم والديكم خلونا نغيم سيايرنا 50% مانبي تغييم 100% .. بس خلونا نعيش يومنا ونقدر نقضي مشاويرنا .. المشكلة ان السعودية وقطر مسموح عندهم واحنا ليلحين ممنوع عندنا .. مادري شسالفة ربعنا؟
  
  
• June 22, 2008
• 20:37

  !وين ماتطبون لاعنين خير العالم

   » ‎ A3N: Alien 3aba6 Network!
  
  
  سؤال .. الكويتي ليش كل مايطب مكان او يشوف له شي يديد تلاقي فجأه سعره يرتفع ويصير دبلات؟ .. مادري ليش احس الكويتيين صايرين مثل إسطورة الملك ميداس
  
  
  اليوم احد اصحابي اتصل على
  
  صديقي: ها ايليين ليلحين معزم تروح السعودية وتچيــّل البيت من هناك؟
  انا: إي والله .. ودي اشوف فرق الاسعار اللي مخلي ربعنا طايحين تشرّي من الخفجي
  صديقي: انا توني ياي من هناك
  انا: افاااا !! وليش ماتكلمت ولا قلت؟
  صديقي: لاكان عندي شغلة بسيطه كنت بخلصها .. وانا راجع قررت اني اروح اشتري ماجلة بيت
  انا: شلون الاسعار؟
  صديقي: والله فرق سما عن ارض .. بس طبعا مو بكل شي .. في اشياء مقاربه الى نوع ما
  انا: يعني المره اليايه نروح مع بعض؟
  صديقي: ماكو مره يايه
  انا: ليش؟
  صديقي: وانا على حدود السعودية داش الكويت .. وقفوني وموقفين وايد كويتيين رايحيين يتشرّون
  انا: ليش عسى ماشر؟
  صديقي: يقولك خلاص مانعين اي كويتي يروح يتشرى من هناك ويدخل الماجلة للديره .. وأخذوا اسماءنا علشان اذا كررناها راح يخلونا ننزل الاغراض على الحدود وندش .. الا اذا عندك احد شي ثاني
  انا: شكوووو؟؟ ليش؟؟
  صديقي: يقولون ان اهل السعودية والخفجي بالذات قاعد يتشكون .. يقولون ان الاسعار عندهم ارتفعت وايد .. بالإضافه الى ان الكمية مو مكفية معاهم .. ويا اخي ما الومهم لو شايف ربعنا كأنهم جراد .. من كل شي ماخذين كرتون
  انا: لا حول الله .. حتى من هذي فلسنا
  
  
  يعني الحين سعر البضاعه زاد على سكان الخفجي والسبب هو المواطن الكويتي
  
  هممممممممم .. نرجع 5 سنين الى الوراء شوي
  
  قبل 5 سنيين تقريبا ربعنا هبــّوا بشراء الاراضي بسلطنة عمان .. وبعد فتره شنو صار بأسعار الاراضي هناك؟؟
  
  انزين خل انشوف شي ثاني
  
  شقق مصر شلون كانت اسعارها وليمن بدى الكويتي يشتري شلون صارت الاسعار؟
  
  شقق وبيوت لبنان نفس الطريقه .. وين كانت ووين صارت؟
  
  18 سنه للوراء الامارات العربية المتحدة .. وخصوصا امارة دبي .. كانت شبة صحراء .. الكويتيين راحوا هناك .. وإشتروا الاراضي وإشتروا الشقق .. وفتحوا عيون الناس على اشياء مالها اول ولا تالي .. والحين امارة دبي تعاني من ارتفاع اسعار غير طبيعي بأسعار الاراضي .. والشقق .. والبيوت .. والاجارات .. والسلع .. و .. و .. و
  
  
  ياعزيزي الكويتي .. اذا عندك مشاكل حلها داخل ديرتك .. واذا ماتقدر تحل مشاكلك لاتخرب على غيرك
  
• June 19, 2008
• 21:06

  !احنا بعد وياكم

   » ‎ A3N: Alien 3aba6 Network!
  
  
  سو خير وقطه بحر
  
  
  
  
• June 18, 2008
• 6:51

  Super Falcon .. شاركونااااااا الامل

   » ‎ A3N: Alien 3aba6 Network!
  تحديث
  ***
  
  دور الالمونيوم هالمره
  
  نفس السالفة كل مره
  
  ____
  
  هم تحديث
  ***
  
  نواب يقدمون اقتراحاتي للمجلس
  
  
  عاشوا الشباب
  
  يريت تطالبون بإسقاط القروض
  وزيادة الخمسين دينار
  وزيادة علاوة الاطفال
  وزيادة قرض الزواج
  وزيادة لمت الفيزا مالتي
  
  والمطالبة بدعم الآش .. صاير 300 فلس
  
  
  شقيقي مطقوق .. شلون الواحد يقدر يشاركم الامل؟ .. فيني امل مو طبيعي
  
• June 16, 2008
• 18:16

  !ويقولون اللبنانيين دمهم ثقيل

   » ‎ A3N: Alien 3aba6 Network!
  مقطع من مسرحية انا مش ارهابية
  عرضت في امريكا وكندا واستراليا ولبنان
  2002 - 2003 - 2004
  
  مشهد يتكلم عن شخصية "ام حسين" قاعد تقرأ فنجان لأجنبية .. وتستعين بصديقتها "إم الياس" لترجمة كلامها للأجنبي
  
  
  ودي اشوف مسرحية من مسرحيات طارق العلي او داوود حسين تنعرض برة الكويت او على الاقل توصل لي ربع مستوى هالمسرحية
  
  
  
  
  
  
  
  ملاحظة على الماشي: شخصية ام حسين اللي بالمسرحية تشابة شخصية ابلة عطيات .. هممممممم حتى هذي طلعت مبيوقة؟
  
• June 12, 2008
• 16:48

  !والله فرق

   » ‎ A3N: Alien 3aba6 Network!
  الحملات التوعوية للحجاب عندنا وايد
  بس مادري ليش فيها شوي قلت احترام للطرف الآخر
  
  على سبيل المثال
  
  
  
  الدكتور محمد العوضي .. يشكر على المجهود اللي قاعد يقدمه للمجتمع الاسلامي .. بس الصورة اللي فوق يقول فيها "على راسي" ويأشر على البنت .. انزين بنات السفور تحت نعالك؟
  
  يعني لو مثلا استبدل جملة "على راسي" بـ"زاد احترامي لك" .. بنظري راح تكون احلى
  
  
  
  
  الصورة الثانية مادري شنو شلون صايره
  البنت المحجبه حاطين صورتها و"يعجبهم حيائها" والبنت السفور والمحجبه الثانية جليلات حيا
  
  طبعا قاعد تسألون نفسكم ليش المحجبة الثانية جليلة حيا؟
  عادي .. الاجابة بسيطه .. المحجبة الثانية عبايتها مطرزه .. طز بحجابها وطز بعبايتها فقط لأن عبايتها مطرزه فأنها جليلة حيا
  
  
  
  
  هذي الصورة وصلتني بالإيميل .. وبنظري افضل من الحمله اللي طايحتله اهانة بالناس .. الى حد ما
  
  صوره بسيطه ومعبره .. ومفهوم الحجاب يوصل
  
  صوّر البنت بأنها حلاوه متروسه سكر
  
  شعليكم يالبنات صرتوا حلاو
  
  من ناحية ثانية .. صور الشباب بأنهم ذبان
  
  لووول .. وللأمانه صج .. الشباب جنهم ذبان على البنت .. ومو اي ذبان .. الاخضر العراقي اللي يبرق .. ويكون دايخ
  
  
  
• June 07, 2008
• 8:48

  !يعني واضحة السالفة

   » ‎ A3N: Alien 3aba6 Network!
  
  
  مادري انا اللي مو راضي افهم .. والا السالفه فيها إن
  
  سعر الأسمنت ليمن زاد كان السبب واضح .. ماكو مصدر ثاني فالطلب يزيد
  الحديد نفس السالفه .. مصدر واحد وماتقدر تستورد .. بديهي السعر يزيد لكثرة الطلب
  وبما ان اسعار مواد البناء قامت تزيد .. الخشب زعل ومايبي يحس انه منبوذ .. فتلقائي شنو يصير؟
  
  لاتزم تقلل كميته علشان السعر يزيد .. السؤال يقول: شلون تقلل كمية الخشب؟
  
  الاجابة الاولى بتاريخ 26-4-2008
  
  والاجابة الثانية بتاريخ 5-5-2008
  
  لازم تحرق الكمية الزايده .. منها تستفيد من التأمين ومنها تزيد ارباحك
  
  
  حلو .. الحين ننتقل حق الشغله الثانية .. اخذوا نفس عميق .. وصحصحوا معاي
  
  قبل فتره .. طلعت بالديره مشكله اسمها "مشكلة الاعلاف" .. التاجر رافع سعره والمشتري موقادر يشتري كميتة .. قامت القيامه والنواب قاموا يطالبون بدعم الاعلاف ومسيرات .. والماشي كانت تطلع بالشارع وتحرك اعلام .. وإعتصامات جدام المجلس علشان قضية الاعلاف
  
  
  الديره ولله الحمد استجابت للمطالبين .. وقالت للتاجر: ياعمي خلاص .. احنا ندعم الاعلاف .. بس واللي يرحم والديك فكنا
  
  التاجر ما بإذنه ماي .. رد وقال: اوكي دعموا الاعلاف! .. وبعد فتره .. ياسبحان الله .. شنو تتوقعون صار؟
  
  الاجابة الاولى مخزن اعلاف بالصليبية
  
  والاجابة الثانية مخزن اعلاف على طريق السالمي
  
  اي نعم .. لازم تقل الكمية .. علشان يزيد الطلب .. وهم التأمين يغطي .. وهم مدعوم
  
  
  عادي عادي .. لاتنصدمون .. لأن يا اعزائي الخبر اللي قريته اليوم اهوا الصدمه
  
  كرتون البيض .. 15 دينار؟ .. شلون ؟؟ نفس الطريقه .. قلل الكمية يزيد الطلب
  
  واكبر مزرعتين؟ .. هممممممممممم اوكي مابي اقول نايف والمتحده علشان ما احط بذمتي
  
  ياجماعه .. شهالعبط؟؟ .. ترى والله واضحه .. كل المواد اللي عليها دوس بالديره قاعد تقل بنفس الطريقة .. حرائق في حرائق .. لاتقولون درجة الحراره عالية او التماس كهرباء .. وين التحقيقات بهالمواضيع؟؟ .. بتقولون احسن النية يمكن صج حرائق .. لايبا .. معروفه التاجر اللي يطيحون عليه نايم على سلعه وخاشها عنده لين يرتفع سعرها يشرشحونه .. شلون يقلل كميته من غير هالتشرشح؟ .. اعيدها ؟؟ .. حراااااااااااااااااائق
  
  
  
  الاستنتاج
  
  حريق اخشاب + حريق أعلاف + حريق شركات بيض = حريق مخبات المواطن
  
• June 05, 2008
• 11:20

  مخملي Undercover

   » ‎ A3N: Alien 3aba6 Network!
  
  
  مشكلته ان يقول مسكين ويمشي يم الساس
  يارااااااااااااجل
  
  علمني أي ساس تمشي يمه؟
  
  تستاهل يا بومريوم .. ومنها الاعلى .. اتمنى لك التوفيق والنجاح
  
  
  خلاص الحين تنسانا ويصير عندك ربع يدد .. فؤاد الهاشم .. وعبداللطيف الدعيج
  
• June 04, 2008
• 0:53

  ويقولون الرصاص اللي كل شوي طايح علينا وعلى عيالنا مو وين؟

   » ‎ A3N: Alien 3aba6 Network!
  
  
  ملاحظة: الدائرة الرابعه والخامسه ماعندهم هالسوالف
• June 02, 2008
• 8:07

  !نحو مستقبل شبابي افضل

   » ‎ A3N: Alien 3aba6 Network!
  
  
  قاطعوا ستار اكاديمي
  
  لاتنصدمون .. لاتنصدمون .. اي نعم ليتل ايلين يؤيد وبشده مقاطعة ستار اكاديمي .. مو قاعد اخرّف .. ولا اطلقت اللحية او لبست العمامه .. ولا حاط في بالي اني اقتل البهجه اللي في قلوب البعض ولا بقمت الحريات عندنا
  
  وجهت نظري راح تكون ان شاء الله بسيطه .. والكل راح يكون قادر على ان يستوعبها
  
  عندما طالب نوابنا علي العمير و حسن قويعان و وليد الطبطبائي ومحمد هايف المطيري وتجمع ثوابت الامة عن وقف ومنع لجنة ستار اكاديمي من خوض اختبارات اختيار طلاب الاكاديمية للموسم السادس قامت القيامه وقعدت .. اغلب مدونات الكويت بدأت القصف الجوي على النواب فقط لمعارضة البرنامج .. اللي يقول مانبي وصايا علينا واللي يقول راح يقلبونا دولة طالبانية .. واللي قام يسب ويلعن .. واللي راح جوني روكتس وطلب كلاسك برجر مع انين رينجز .. وكل هذا ليش؟ .. والكل يدري
  
  يا اعزائي .. الموضوع لازم تشوفونه بأكثر من نظره .. انتوا قاعد تشوفون نفسكم مع هذا البرنامج وتعايشكم معاه .. ولكن اغلبكم بالواقع مو متابع هذا البرنامج .. لكن تكفوووووون تكفووووون .. شوفوا البرنامج من منظور الجيل الجديد القادم .. يا اخوان مساوء البرنامج على الاطفال والمراهقين ثلاث اضعاف الضرر على البالغين
  
  العزيز كيو كتب في مدونتة ان النواب مو مهتمين بالتعليم والإقتصاد والتنمية .. جيلنا اليديد اذا بيمشي على خطوات ستار اكاديمي وشاكلته .. اي تعليم تتوقع بفيد؟ واذا اكبر الشركات قاعد تشارك بهالبرامج وتوزع جوائز خيالية بالهبل على طلاب الأكاديمية وشفط فلوس من مسجات الناس أي اقتصاد بيتعدل؟ شنو التنمية اللي تبونها من جيل قاعد يخترب جدام عيونا تحت ستار الحرية الشخصية
  
  انا مع الحرية الشخصية .. ولست ضدها .. لكن في امور وشغلات تعتبر دخيله علينا ومو من عاداتنا - ولن اقول تقاليدنا - بتسئلوني ليش مو تقاليدنا ؟؟ .. لأن الخمور والبكيني على البحر كان موجوده عندنا بالكويت وذاك الوقت كان كل شي مقبول .. اما الحين وبالوقت الحاضر الوضع مايسمح انك تكون متفتح لي هالدرجه .. وخصوصا مع انتشار التكنولوجيا والبلوتوث والفضايح و و و .. الوضع قاعد يسوء فلازم نحافظ على سمعتنا اللي قاعد تتلاشى مع السنين
  
  من مساوء برنامج ستار اكاديمي
  
  المتقدمين للبرنامج من اعمار 18 الى 22 - لكن الواقع ان المتقدمين يكونون من تحت ال 15 الى فوق ال 25 .. انا ماراح اتكلم عن الواقع لكن راح اتكلم عن 18 الى 22 .. هذا العمر مو سن تخرج؟ .. يعني مو المفروض قاعد يشوف مستقبله بتسجيل جامعه او يمكن مسجل وقاعد يدرس بالكورس الاول اوالثاني؟ .. ليش نشجع هالطلبة على توقيف القيد لمدة كورس؟؟؟ .. وعلى شنو؟؟؟ .. وين الفايده؟؟؟
  
  
  البرنامج في موسمة الاول كان ينبلع لنوع ما .. فقط لأنه كان غريب واول مره نشوف شي جذي 24 ساعه على الهوا .. فكان مسلي ان نشوف الطلبة واهم مايدرون شنو قاعد يصير لهم بره .. وكانت القضية اللي هزت مشاعرالكل هي قصة حب بشار وصوفيا .. هممممممم انتوا الكبار انهزت مشاعركم .. انزين في مدرسة تقدر تفيدنا بشنو طالبات المرحلة الابتدائية او اي احد قريبه لكم من المرحلة الابتدائية بشنو كانت تفكر ليمن بشار وصوفيا عاشوا قصة الحب على الهوا مباشر جدامنا؟ .. هل البنت الصغيره هذي راح تتأثر ولا لأ؟ .. هل راح تدور على حب عادي شافته بالتلفزيون ولا لأ ؟؟
  
  
  5 سنين على التوالي والبرنامج معروض ومستمر .. احد يقولي شنو استفاد جيلنا القادم من دروس وقيم يتحلى فيها بمجتمعنا؟ .. علم الصغير لغة الحوار مع الكبار؟ .. علم الصغير شلون يبني مستقبله؟ .. علم الصغير شلون يسوي سبايكي لشعر اباطه كنيو لووك؟ .. ابي احد يذكري شنو التعليم اللي استفاد منه ابنك او ابنتك او اي قريب لك من هذا البرنامج
  
  
  الموسم الخامس كان في مفاجأه من مدام رولا لكم .. اضافت حصة حمام السباحه .. واااااااااااااااو .. شكرا مدام رولا .. بصراحة ادمعت عيونا .. واخيرا قمنا نقدر نشوف البكيني والمؤخرات وعصاقيل الشباب في مكان واحد هادف .. مرسي لإلك مدام رولا .. وبليز بليز بليز نكست سيزن حطي للشباب والصبايا غرفة نوم فيها اضاءه حمره .. وسنتد كاندلز مع كاميرات نايت فجن
  
  
  كل واحد من عيالنا يشارك بهذا البرنامج يقول جملتة الشهيره "ابي ارفع اسم بلدي!" .. مالت عليك وعلى ويك .. تبي ترفع اسم بلدك بدق ورقص واغاني ومصخره؟ .. ليش ماترفع اسم الكويت بشهادتك الجامعيه؟ .. ليش ماترفع اسم الكويت بأحد الاختراعات؟ .. ليش ما تساعد في تقديم أعمال انسانيه والتطوعات الشبابية؟
  
  
  وبالأخير انا مو ضد الحريات .. ولا ابي افرض رأيي عليكم .. ولابعلمكم شلون تربون عيالكم .. لكن عيال الديره (من في فترة المراهقة) والجيل القادم قاعد تتسمم افكاره من شغلات بطاليه ماقاعد تطور من البلد لكن تهدمها
  
  
  ياجماعه فيدوني ونوروني بشنو البرنامج يفيد؟ .. يمكن انا غافل
  هل الكل يبي البرنامج عناد فقط لأن النواب ملتحين؟ .. ام في سبب تنموي؟
  
  
  انا مع النواب المعارضين للبرنامج
  و لا لا للدمار اكاديمي
  
• June 01, 2008
• 19:18

  !! تفاءلوا .. تفاءلوا .. تفاءلوا

   » ‎ A3N: Alien 3aba6 Network!
  
  
  
  مقطع 2:55
  الريال كلة تفاؤل في تفاؤل
  ان شاء الله دوووم
  
  وهذا الرد كتبتة في مدونة اخي في التدوين بوجيج
  وانقله لكم هني
  
  
  At Sunday, June 01, 2008 6:07:00 PM, LiL ALiEN said...
  
  حرام عليكم
  
  والله ظلمتوا الكل وليلحين ماابتدوا .. قولوا لااله إلاالله .. صفوا النيه .. ترى كل شي يتغير بيوم وليله وخلال ثواني وبغمضة عين .. يمكن يكون هذا مجلس انجازي وانتوا اكلتوه ولعنتوا خيره من بدايتة
  
  ((وعسي ان تكرهوا شيئا وهو خير لكم وعسي ان تحبوا شيئا وهو شر لكم والله يعلم وانتم لا تعلمون))
  
  
  مبروك للوزراء ومبروك للنواب .. والكويت امانة برقبتكم .. وهالله هالله فيها
  
  
• May 29, 2008
• 18:18

  بسنا تأزيم .. خلوا العجله تدور

   » ‎ A3N: Alien 3aba6 Network!
  تحركات نيابية لمقاطعة جلسة الافتتاح
  الخروج بعد مغادرة الأمير احتجاجا على التشكيلة الوزراية
  
  29/05/2008الآن-خاص
  
  

  علمت الآن أن ثلاثة نواب بدأوا التشاور اليوم لحشد أكبر عدد ممكن من النواب لمقاطعة جلسة الافتتاح احتجاجا على التشكيل الحكومي الجديد، وأفادت مصادر أن النواب سينسحبون بعد إلقاء النطق السامي ومغادرة صاحب السمو الأمير جلسة الافتتاح. وقالت مصادر أن النواب سينسحبون قبل إلقاء الوزراء الجدد القسم الدستوري.

  مصادر رجحت أن يعلن النواب عن تحركهم هذا اعتمادا على العدد الذي سيحصلون عليه، وقد لا يتم هذا التحرك ما لم يحصلوا على عدد 'مقبول' من المؤيدين، وقد رجح أحدهم أن يسجل موقف الاعتراض بغض النظر عن عدد من يرافقه في هذا الاحتجاج. ورجحت مصادر أن هذا التحرك قد لا يلقى تأييدا، لكن النواب يريدون تسجيل موقف مبكر ضد حكومة يعتقدون أنها لن تعمر طويلا ولكي يثبتوا موقعهم في خندق المعارضة مبكرا

  أحد النواب طلب مهلة قبل تأييد الاحتجاج أو رفضه، فيما يبدو أنه استقراء للساحة ومعرفة عدد من سيشارك فيه

  
  
  حكومتنا العزيزة في البداية الف مبروك على هذا التشكيل ووفقكم الله
  
  اما بخصوص الموضوع الاعلى .. فأتمنى من كل قلبي اذا انسحب اي نائب من جلسة القسم .. ان يتم شطبه اسمه كنائب واستبداله من هم بترتيب 11 وفوق من المرشحين
  
  Think about it!